Maskne – L-Akne l-Ġdida Kkawżata Mill-Maskra Li Tipproteġik Mill-COVID-19

Aħna ta’ Wham staqsejna lill Dr Charmaine Apap fuq Maskne…

F’xogħli qed jiżdiedu ħafna konsultazzjonijiet ma’ pazjenti (nisa u rġiel) li qed jaraw l-akne ħabba l-użu ta’ maskri għal żmien twil. Dan qed jiġri f’nies li qatt ma kienu esperjenzaw l-akne qabel, kif ukoll qed tiggrava s-sitwazzjoni anke f’dawk li kienu diġà suxxettibbli għall-problema.

Tant kemm hawn nies madwar id-dinja li qed ibagħtu minn din il-problema, li nħalqet it-terminoloġija ‘Maskne’. Il-‘Maskne’ hija kkawżata mis-sħana, frizzjoni u okklużjoni li tiżviluppa taħt il-maskra (fil-fatt huwa tip ta’ akne okklussiva msejħa “acne mechanica“). Dan huwa aggravat aktar bl-umdità (permezz ta’ għaraq, nifs u taħdit) u żejt, li huwa mmanifatturat mill-glandoli sebaċea (żejt) li jinsabu fil-ġilda tagħna stess.

X’ Tista’ Tagħmel Biex Tevita Jew Ittejjeb Il-Kundizzjoni?

– Tindif ġentili darbtejn fil-ġurnata

– Moisturiser ħafif u mhux żejtni (fittex “oil-free” jew “non-comedogenic”). Għal dawk li għandhom ġilda partikolarment żejtnija, huwa aktar ideali li tuża ‘moisturiser’ ġel milli krema jew ‘lotion’.

– Prova naqqas l-użu tal-make-up fuq in-naħa t’isfel ta wiċċek u partikolarment evita l-‘foundation’. Jekk dan huwa mportanti ħafna għalik, forsi tista tuża ‘tinted moisturiser’ jew krema ta’ protezzjoni mix-xemx mogħtija lewn ħafif minflok. Dan ifisser li jkollok soluzzjoni ta’ 3-in-1 b’ ‘moisturiser’/sunscreen/make-up ġo prodott wieħed biex tevita saffi żejda ta’ prodotti differenti.

– Żomm ir-rutina tal-ġilda sempliċi kemm tista u evita prodotti li għandhom sustanzi irritanti bħall ‘benzoyl peroxide’, ‘retinols’ (bħall ma ssib fl-‘anti-ageing’/’rejuvenating’ u l-kremi ta’ kontra t-tikmix) u ‘salicylic acid’ (sakemm ma jkunx irrakkomandat mit-tabib).

– L-użu ta’ ‘scrubs’ u ‘peels’ m’huwiex rakkomandat f’dawn iċ-ċirkostanzi.

– Jekk qed tuża maskra tal-qoton għandha tiġi maħsula kuljum (itrattahom bħal ma titratta l-qliezet ta’ taħt). Għal din ir-raġuni huwa rakkomandat li jkollok aktar minn maskra waħda biex dejjem issib lesta maskra nadifa kuljum.

– Għal dawk li qed jużaw is-‘surgical masks’, dawn huma rakkomandati li jintremew wara li jiġu użati u b’hekk m’għandhomx jiġu wżati għal aktar minn ġurnata waħda.

Jekk il-problema tippersisti jew tiggrava minkejja l-użu ta’ dak imniżżel hawn fuq, jista’ jkollok bżonn trattament preskritt għall-akne. F’ dan il-każ tajjeb tkellem tabib jew dermatoloġista għal aktar pariri.

Minkejja dawn il-problemi relatati mal-maskri, l-użu tal-maskri huwa rakkomandat għax bihom inkomplu nipproteġu lil xulxin mit-tixrid tal-COVID-19 u b’hekk nerġgħu nieħdu l-kontroll tas-sitwazzjoni f’idejna fil-komunita’ tagħna.