Li ssir omm huwa vjaġġ sabiħ li n-nisa jgħaddu minnu. L-eċitament li jwassal għad-data fejn suppost titwieled it-tarbija, il-ferħ meta żżomm it-tarbija tiegħek għall-ewwel darba, u dik ir-riħa ta’ tarbija ġdida hija xi ħaġa barra minn din id-dinja.
Ir-realtà għal xi nisa, madankollu, hija li dawk l-ewwel ftit xhur huma eżawrjenti. In-nuqqas ta’ rqad jista’ jwassal biex ommijiet ġodda jħossuhom ma jifilħux, fiżikament, mentalment u emozzjonalment. Dan mhux il-każ għal kulħadd; L-ewwel wild tiegħi fil-fatt kien jorqod ħafna.
It-tieni wild tiegħi, min-naħa l-oħra, kien ferm ‘il bogħod minn hekk. Bkiet għal dawk li ħassejthom qishom sigħat twal qabel l-irqad, sa punt fejn ħafna mill-ħin kont inċedi u nibki magħha. Kienet tqum ħafna drabi matul il-lejl li kont nitlef l-għadd, u filgħodu ftit jew xejn kien jibqali enerġija biex nieħu ħsieb żewġt itfal, aħseb u ara naddaf, insajjar u nieħu l-ħin biex nieħu ħsiebi nnifsi. Dan kollu baqa’ għaddej għal ħames xhur.
F’dan il-punt, f’moħħi ftakart li meta kont tarbija jien, kont ukoll nagħmel bħalha. Il-ġenituri tiegħi kellhom iljieli bla rqad għal sentejn sħaħ (nemmen li binti kienet il-karma tiegħi!). Irrifjutajt li nħalli dan iseħħ. Ħassejt lili nnifsi qed nidgħajjef, u kelli bżonn nieħu ħsieb is-saħħa mentali tiegħi, mhux għalija biss, iżda għal uliedi.
Meta ċ-ċkejkna tiegħi kellha ħames xhur, użajt l-istudji tiegħi biex inħarriġha torqod, u kienet l-aħjar deċiżjoni li stajt ħadt. L-iljieli bla rqad kienu verament affettwawli saħħti, u bdejt inħossni dejjem aktar aħjar ladarba bdiet torqod matul il-lejl.
Lin-nisa tqal jgħidulhom “Orqad issa għax meta tiġi t-tarbija, tista’ tgħid addiju għal rqad tajjeb”. Filwaqt li dan jista’ jkun minnu għal xi wħud, se nżid ukoll- “Imma ħu nifs fil-fond, għax, hemm soluzzjonijiet.”
Filwaqt li mhux rakkomandat li tuża sleep-train fuq tarbija tat-twelid, l-introduzzjoni ta’ drawwiet ta’ rqad b’saħħithom mill-bidu tista’ taħdem tajjeb ħafna. Jekk, f’erba’ xhur, int għadek għaddejja minn problemi tal-irqa mal-lejl, allura li tgħallem liċ-ċkejken tiegħek il-ħila ta’ rqad indipendenti tirriżulta li tqum tħossok mistrieħa sew filgħodu. U l-aktar importanti, itlob għall-għajnuna! Jekk tħoss li int dgħajjef wisq biex tagħmel il-kompiti ta’ kuljum, itlob lil xi ħadd li tafda biex jieħu ħsieb it-tarbija tat-twelid tiegħek waqt li jkollok naqra ħin fejn tistrieħ. Aħna l-ommijiet kultant inħossu li rridu nagħmlu kollox waħedna, imma nista’ nassigurakom li dawk li jħobbuk se jieħdu l-opportunità biex jgħinuk.
Ftakar li n-nuqqas ta’ rqad jista’ jġiegħlek ikollok problemi biex timmaniġġja l-emozzjonijiet tiegħek, nuqqas ta’ konċentrazzjoni, u żieda fl-istress, filwaqt li iħalli impatt fuq is-saħħa fiżika tiegħek. Għandek bżonn tieħu ħsieb lilek innifsek biex tkun tista’ tieħu ħsieb lil uliedek!
