Jiena mara ta’ 33 sena bil-HyperPARAthyroidism. Ingħatajt din id-dijanjosi fl-eta’ ta’ biss 30 sena.
Testijiet tad-demm li għamilt għall-ewwel darba bħala parti mir-rutina wrew livelli għolja ta’ kalċju, li mal-hyperparathyroidism, jikkawża livelli għolja ta’ ormoni relatati mal-parathyroid kif ukoll livell baxx ta’ vitamina D.
Importanti ħafna li meta tagħmlu testijiet tad-demm taraw li dawn jiġu eżaminati b’ reqqa minn xi professjonista.
Xi wħud jaħsbu li huwa tajjeb għall-ġisem li jkollok livell għoli ta’ kalċju. Madankollu dan mhu vera xejn! Esperjenzajt diversi ‘scans’ f’ għonqi biex jipprovaw isibu l-glandola, u eventwalment kelli wkoll nitla’ l-Italja biex nipprova ‘scan’ ieħor, u hemm ħareġ ir-riżultat!
Ċertu nies jesperjenzaw diversi sintomi, iżda fil-każ tiegħi jien qatt ma’ kelli sintomi. Madankollu, skond ma wera’ ‘density scan’, għandi għadmi dgħajjef meta mqabbel ma’ persuni oħra ta’ l-eta’ tiegħi.
Din il-marda tista’ biss tiġi solvuta permezz ta’ operazzjoni, u għalhekk qed nittama li nara differenza wara li nagħmel dan. Din il-marda tikkawża wkoll ħsara lill-ġisem u tista’ twassal għal osteoporożi u kundizzjonijiet mediċi oħra jekk ma’ tiġix ittrattata sew.
X’ inhi eżatt il-‘HyperParaThyroidism’?
Hyperparathyroidism hija meta l-‘parathyroid glands’ jikkawżaw iżżejjed ormoni relatati mal- ‘parathyroid’ fid-demm. Dawn il-glandoli li jinsabu wara t-‘thyroid’ in-naħa t’ isfel ta’ l-għonq, huma biss daqs ħabba tar-ross. Dawn l-ormoni jgħinu billi jżommu bilanċ xieraq ta’ kalċju fid-demm u fit-’tissues’ tal-ġisem li jiddependu mill-kalċju biex jiffunzjonaw sew.
Jeżistu żewġ tipi ta’ hyperparathyroidism. F’ ‘hyperparathyroidism’ primarja, kobor eċċessiv ta’ waħda jew aktar mill-‘parathyroid glands’ jikkawżaw produzzjoni żejda ta’ l-ormoni. Dan iwassal għal livell għoli ta’ kalċju fid-demm li jista’ mbagħad jirriżulta f’ problemi varji fis-saħħa. L-aqwa trattament għal ‘hyperthyroidism’ primarja hija operazzjoni.
‘Hyperparathyroidism’ sekondarja sseħħ minħabba mard ieħor li jkun diġa’ kkawża livell baxx ta’ kalċju fil-ġisem, li maż-żmien iżid l-ammont ta’ ormoni relatati mal-‘parathyroid’.
Ħafna drabi d-dijanjosi ta’ ‘Hyperparathyroidism’ tingħata qabel jibdew jidhru sintomi jew sinjali oħra tal-problema. Dan għaliex meta jibdew jiġu evidenti s-sintomi, dawn ikunu fil-fatt ir-riżultat ta’ ħsara jew disfunzjoni f’ organi jew ’tissues’ oħra kawża ta’ livell għoli ta’ kalċju fid-demm u fl-urina, jew nuqqas ta’ kalċju fl-għadam.
Is-sintomi jistgħu tant ikunu ħfief u mhux speċifiċi li kultant lanqas biss tkun tidher konnessjoni ma’ problemi fil-funzjoni tal-‘parathyroid’. Madankollu huwa possibbli li persuna tesperjenza sintomi severi wkoll. Sinjali u sintomi jinkludu:
- Osteoporożi
- Ġebla fil-kliewi
- Ammont eċċessiv ta’ awrina
- Uġigħ fl-addominal
- Tgħajja faċilment jew tħossok bla saħħa
- Dipressjoni jew problemi ta’ memorja
- Uġigħ fl-għadam u fil-ġogi
- Mard frekwenti mingħajr kawża evidenti
- Dardir, remettar jew nuqqas t’ aptit
L-aħħar parir mingħandi fuq bażi ta’ l-esperjenza personali tiegħi…iċċekkja l-kalċju.
Tista ssib aktar informazzjoni dwar HyperParaThyroidism fuq MayoClinic.org
